آآآآه يا القهر.. تو ما طلع لك لسان يا ابن صميخ، واعترفت بالضرر الواقع على أبناء قبيلتك؟! طيب وينك من 20 سنة، يوم سحبت الحكومة الله يسامحها جناسينا وشردتنا ولعوزتنا💔💔 وفرقت الأب عن عياله والزوج عن زوجته؟!
أنت تدري كيف كنا عايشين؟ وكيف الحين عايشين؟ تعرف إن فيه أطفال عرفوا أنفسهم إنهم قطريين 🇶🇦 فقط بالاسم دون جنسية أو أوراق؟ 😢 هذولي وش ذنب إنك تعاقبهم على شيء بالأساس غير موجود إلا في أحلام معازبيك؟
الحين صار ازدواج الجنسية عيب في قطر وممنوع 🚫.. طيب والأجانب المجنسين في كل دوائر ومفاصل ورياضة الدولة.. وش ممكن نسميهم يا ابن صميخ؟!
ليش صار الأجنبي في بلدي أغلى وأعز مني؟ ليش صار أهلي وجماعتي يقومون كل صبح وأيديهم على جناسيهم يخافون تطير بأي لحظة! 😭
إذا كان عند الحكومة خلاف أو مشكلة مع *10* أو *20* ليش ينسحب الموضوع على قبيلة كاملة *6000* بحريمها ورجالها وشيوخها وأطفالها؟ بالله عليك الشيء هذا مو حرام؟.. قطر اللي دافع عنها أجدادنا وبنيناها مع أولادنا، تتنكر لنا بهذا الشكل؟! 😔
ترى الغفران مو حزينين على بيت 🏡 انسحب وإلا حساب 💵 تجمد وإلا أملاك وحلال صادروه اللي ما يخافون الله.. شرهتهم كبيرة على بلد تنكر لهم بعد ما أسقوه من دمهم وعرقهم.. وما صار معهم للأسف ممكن يصير مع غيرهم
